அமெரிக்க ராணுவ ரகசியம் அம்பலம்

 அமெரிக்க ராணுவம் ரகசியமாக வைத்திருந்த போர் தகவல்கள் அம்பலத்துக்கு வந்திருக்கின்றன. அத்தனையும் ஆப்கானிஸ்தானில் அமெரிக்க உளவுப்படை ஆட்கள் சேகரித்தவை.

தலிபான் பயங்கரவாதிகளை ஒழிப்பதற்காக நட்பு நாடுகளை சேர்த்துக் கொண்டு அங்கு அமெரிக்கா நடத்தும் போர் ஒன்பது ஆண்டுகளை பூர்த்தி செய்யும் நேரத்தில் கசிந்துள்ள இந்த தகவல்கள், போரின் போக்கையே மாற்றும் என எதிர்பார்க்கப்படுகிறது.

போரில் உதவ அமெரிக்காவிடம் ஆண்டுக்கு ஐயாயிரம் கோடி வாங்கும் பாகிஸ்தான் மறைமுகமாக தலிபான்களுக்கு உதவுகிறது என்ற உண்மை ஆதாரங்களுடன் வெளிச்சத்துக்கு வந்திருக்கிறது. உளவு அமைப்பான ஐஎஸ்ஐ எப்படி இரட்டை வேடம் போட்டு இரு அரசுகளையும் ஏமாற்றுகிறது என்பது சுவாரசியமாக தொகுக்கப்பட்டுள்ளது.

‘ஆப்கானிஸ்தான் மற்றும் இந்தியாவுக்கு எதிரான நாசவேலைகளை திட்டமிட்டு நிறைவேற்றும் பொறுப்பு எஸ் விங் என்ற பிரிவிடம் ஒப்படைக்கப்பட்டுள்ளது. இது எவருக்கும் பதில் சொல்ல அவசியமில்லாத அதிகாரத்துடன் செயல்படுகிறது. அதனிடம் கணக்கு வழக்கு இல்லாமல் பணம் புரள்கிறது’ என்பது கசிந்த ரகசியங்களில் ஒன்று. வியட்நாம் போரின்போது ராணுவத்தின் ரகசிய தகவல்கள் அம்பலமானதன் விளைவாக அமெரிக்க மக்கள் போருக்கு எதிராக கொதித்தெழுந்தனர். அதுபோல் இப்போது நடக்கலாம் என சிலர் கணிக்கின்றனர்.

விக்கிலீக்ஸ் என்ற இணையதளம் 92 ஆயிரம் ஆவணங்களை பிரபலமான மூன்று பத்திரிகைகள் மூலம் இந்த ரகசியங்கள் அம்பலமாக வழி வகுத்துள்ளது. அரசாங்கத்தின் அளவுக்கு மீறிய ரகசிய நடவடிக்கைகளுக்கு எதிராக உருவானது அந்த தளம். ‘வெளிப்படையான நிர்வாகத்தில்தான் அனைவருக்கும் நீதி கிடைக்கும். அனாவசியமான ரகசியங்கள் தவறுகள் நடக்க வாய்ப்பளிக்கும்’ என்பது அதன் நிறுவனர் தத்துவம். இராக்கில் அமெரிக்க போர் விமானம் அப்பாவிகள் மீது குண்டு வீசி 12 பேர் இறந்த காட்சி அந்த விமானத்தின் வீடியோவில் பதிவாகி இருந்ததை வெளியிட்டு பிரபலமானது இந்த தளம்.

தற்போது 12 நாடுகளில் தன்னார்வலர்கள் உதவியால் செயல்படும் விக்கிலீக்கை முடக்க ஒபாமா அரசு எடுக்கும் முயற்சிக்கு உலகெங்கும் உள்ள அரசுகள் மானசீகமான ஆதரவு அளிக்கும் என்பது ஊரறிந்த ரகசியம்.